Iravunk.com-ը գրում է․

Երեւանում «Ժողովրդի ձայնը» փորձագիտական ակումբի նախաձեռնությամբ տեղի ունեցավ  «Այսօրվա Հայաստանի  բարձրագույն կրթության ոլորտի հիմնական խնդիրները» կլոր սեղան-քննարկումը:

Ակումբի փորձագետ ԱՐՄԱՆ ՂՈՒԿԱՍՅԱՆՆ իր խոսքի մեջ նշեց, որ քննարկումը այս թեմայի շուրջ միշտ էլ  կարեւոր է  եղել, բայց այժմ ավելի անհրաժեշտ է դարձել՝ կապված բուհերում հայոց լեզվի, գրականության եւ պատմության  առարկաների ոչ պարտադիր ուսուցման հարցի հետ. «Կրթության, գիտության, մշակույթի եւ սպորտի նախարարությունը սկսել է փոփոխություններ անել սխալ տեղից եւ փոխանակ ներկայացնի հանրությանը,թե ինչպես է ուժաղացնելու հայոց լեզվի, գրականության եւ պատմության առարկաները  դպրոցներում, անցել է  բուհերին, եւ այդ առարկաները ոչ պարտադիր է սարքում»:

Բանախոսը նկատեց, որ պետք է լինեին լայն քննարկումներ այդ հարցի շուրջ, բայց նախարարությունը  ընդհանրապես հաշվի չի առել հանրության կարծիքը, ինչը շատ տարօրինակ է. «Նման կարեւոր հարցեր  չեն կարող միանձյա որոշվել, քանի որ դա կապված է ամբողջ ազգի ճակատագրի հետ: Խոսքը գնում է  սերունդների կրթության  մասին եւ նման որոշումները սեպ են խրում իշխանություն-հասարակություն հարաբերությունների մեջ»:

Ակումբի փորձագետն ասաց, որ իրենց քննարկման մեջ փորձել են ներգրավել բոլոր շրջանակներին՝  դասախոսներին, ուսանողներին եւ փորձագետներին, որպեսզի քննարկման բովանդակությունը լինի  բազմակողմանի:

Մեկ այլ բանախոս՝ ԵՊՀ դասախոս, «Ինտեգրացիա և զարգացում» ՀԿ նախագահ ԱՐԱՄ ՍԱՖԱՐՅԱՆՆ ասաց.  «Երկրի գրագետ հատվածը, որ ստանում է ֆունդամենտալ կրթություն եւ վաղը պետք է դառնա երկրի ինտելեկտուալ դեմքը, պետք է հմտորեն տիրապետի հայերենին, ռուսերենին եւ անգլերենին»:

Ա. Սաֆարյանի գնահատմամբ՝ հայերը բնականից շնորհ ունեն լեզու սովորելու. «Որպես ԵՊՀ դոցենտ՝  ասեմ, որ մեր ուսանողներից շատ-շատերը դիմում, ինքնակենսագրություն ռուսերեն, հայերեն եւ նույնիսկ անգլերեն լեզվով գրել չգիտեն»:

Միջոցառմանը ելույթ ունեցան նաեւ այլ բուհերի դասախոսներ, ուսանողներ եւ փորձագետներ:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել