Ադրբեջանի ԱԳ նախարարի՝ սահուն ադրբեջաներենին չտիրապետելն արժանացել է այդ երկրի քաղաքական ու լրատվական շրջանակների խիստ քննադատության:

«bakupost.az» ինտերնետային կայքը, անդրադառնալով Իրանի, Թուրքիայի և Ադրբեջանի ԱԳ նախարարների մամուլի ասուլիսի ժամանակ Ադրբեջանի ԱԳ նախարար Էլմար Մամեդյարովի արտասանած իմաստ չունեցող և քերականական օրենքներին չհամապատասխանող նախադասություններին, գրել է, որ այդ նիստից հետո Ադրբեջանի սոցիալական ցանցերի օգտատերերն ու քաղաքական ակտիվիստներն Էլմար Մամեդյարովին նմանեցրել են «Google translate»-ին:
Ադրբեջանի ազգային ժողովի պատգամավոր Աղել Աբբասն ասել է. «Յուրաքանչյուր պետական պաշտոնատար պիտի տիրապետի ադրբեջաներենին: Էլմար Մամեդյարովը 14 տարի է, ինչ զբաղեցնում է Ադրբեջանի ԱԳ նախարարի պաշտոնը: Այս ժամանակաշրջանը բավարար պիտի լիներ ադրբեջաներենին տիրապետելու համար: Ադրբեջանում մեծ թվով ռուսախոսներ կան: Պետական բազմաթիվ պաշտոնատարներ ու խորհրդարանի պատգամավորներ ռուսախոս են: Նրանք ուսանել են ռուսական թեքումով դպրոցներում կամ Մոսկվայում, բայց նաև սովորել են ադրբեջաներենն ու սահուն խոսում են այդ լեզվով: Իլհամ Ալիևն էլ ռուսական դպրոց է հաճախել և իր ուսումը ստացել է Մոսկվայում, իր ավարտաճառը պաշտպանել է ռուսերենով ու ապրել է ռուսախոսների միջավայրում, բայց նա սահուն ադրբեջաներեն է խոսում (իհարկե, Իլհամ Ալիևն ադրբեջաներեն բառերն արտասանում է հատուկ ակցենտով)»։ (Հղումն՝ այստեղ)

«strateq.az» կայքն էլ թեմային անդրադարձել է՝ հղում կատարելով դիվանագետ և Թուրքիայում Ադրբեջանի նախկին դեսպան Իսֆանդիար Վահաբզադեին: Նախկին դեսպանը պատմում է. «Այն օրերին, երբ զբաղեցնում էի Թուրքիայում Ադրբեջանի դեսպանի պաշտոնը, միջազգային նիստերից մեկի ժամանակ Թուրքիայի ԱԳ նախարարը թրքերենով դիմեց Ադրբեջանի ու Հայաստանի ԱԳ նախարարներին՝ հարցնելով, թե ինչ լեզվով են նախընտրում շփվել: ՀՀ ԱԳ ժամանակի նախարար Վարդան Օսկանյանը թրքերենով պատասխանեց. «Ինձ համար որևէ տարբերություն չունի, էֆենտի»: Բայց Ադրբեջանի ԱԳ նախարար Էլմար Մամեդյարովը ռուսերենով պատասխանեց. «Ինձ պիտի ներեք, իմ ադրբեջաներենը թույլ է»: Եթե ես Էլմար Մամեդյարովի տեղը լինեի, վաղուց լիազորություններս վայր դրած կլինեի: Սա միակ անգամը չէ, որ նրա՝ ադրբեջաներենին չտիրապետելու պատճառով նման իրավիճակ է ստեղծում»:

«Բոլոր դեպքերի մասին չէ, որ կարելի է բարձրաձայն հայտարարել: Օրինակ՝ Էլմար Մամեդյարովը հանդիպումներից մեկի ժամանակ ասել էր. «Մենք մեր «բանը» ցույց տանք, հայերն էլ իրենց «բանը»: Ումը որ լավ եղավ, դա էլ կընդունենք»,- գրել է Թուրքիայում Ադրբեջանի նախկին դեսպանը (հղումն՝ այստեղ

Թարգմանություն իրանական qafqaz.ir կայքից

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել