Արցախա-ադրբեջանական վերջին լարման հանդեպ, ինչպես գրեթե միշտ, այս անգամ էլ անտարբեր չի մնացել նաև ԱՀ-ում ԻԻՀ նախկին դեսպան Մոհսեն Փաքայինը։

Սակայն նախկինում բացառապես ադրբեջանամետ հայտարարություններով հանդես եկած Փաքայինի նոր անդրադարձը, որը տեղ է գտել նրա միկրոբլոգում, էապես տարբերվում է նախկին ելույթներից, հոդվածներից և գրառումներից․ այս նոր հոդվածում նա ջանում է հնարավորինս պահպանել չեզոքությունը և կողմերին զսպվածության կոչեր է անում։

Հոդվածում անդրադառնալով սահմանային վերջին դեպքերին՝ Մ․ Փաքայինը շեշտում է, որ Իրանն այս հակամարտության սկզբից եղել է հակամարտող երկրների կողքին, և մեկ անգամ չէ, որ հադես է եկել հակամարտության միայն ու միայն խաղաղ լուծման կոչերով և նույնիսկ ժամանակին ցանկություն է հայտնել ստանձնել միջնորդի դեր։ Այնուհետև, զարգացնելով թեման, նա նկատում է, որ ներկայումս էլ Իրանը կարող է միջնորդի պարտականությունները վերցնել իր վրա, քանի որ, բացի հակամարտող երկրներից, Արցախի հետ շահագրգիիռ կողմերից ընդհանուր սահման ունի միայն Իրանը և, բնականաբար, ձգտում է պահպանել խաղաղությունն իր երկրի սահմանների մոտ։ Մ․ Փաքային իր հոդվածը եզրափակել է «Հակամարտության երկարաձգումը տարածաշրջանում ոչ մի երկրի շահերից չի բխում, Բաքուն և Երևանը պետք է զսպվածություն ցուցաբերեն և ձգտեն հարցը լուծել բացառապես խաղաղ ճանապարհով» մտքով։

Ակնհայտ է, որ ադրբեջանական կողմն՝ ի դեմս Մ. Փաքայինի, կարծես թե կորցնում է ադրբեջանամետ հայտարարություններ տարածող կարևոր խոսափող, որը նախկինում աշխատում էր հայկական կողմի դեմ:

#ՄերհարևանԻրանը

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել