Newsline.am-ը գրում է.
Թուրքիայում, համաձայն դատարանի որոշման, մասամբ սահմանափակվել է մուտքը Twitter, Youtube և Facеbook սոցիալական ցանցեր, գրում է TRT Haber թուրքական հեռուստաընկերությունը:
Մասնավորապես արգելափակվել են սոցցանցերի այն էջերը, որորնց միջոցով տարածվել են օրեր առաջ Ստամբուլում պատանդ վերցված դատախազ Սելիմ Քիրազի լուսանկարները:
Հիշեցնենք, որ մարտի 31-ին զինված անձինքն Ստամբուլի արդարադատության պալատում պատանդ էին վերցրել դատախազ Սելիմ Քիրազին:
Մեհմեթ Սելիմ Քիրազը հետաքննում էր 2013 թվականին տեղի ունեցած Գեզի այգու ցույցերի արդյունքում վիրավորված և 269 օր կոմայի մեջ մնալուց հետո 2014 թվականի մարտին մահացած 15-ամյա Բերքին Էլմանի գործը: Զինյալները պահանջում էին ձերբակալել 15-այմա ցուցարարին սպանած ոստիկանին:
Ավելի վաղ հաղորդվում էր, որ դատախազին պատանդ վերցրած զինված անձինք Թուրքիայի «Հեղափոխական ժողովրդական ազատագրական կուսակցություն-ճակատ» խմբավորման անդամ են և Քիրազին բազմիցս են սպառնացել սպանել, եթե երիտասարդին սպանած ոստիկանը չձերբակալվի:
Քիրազը, 5 հրազենային վնասվածք ստանալով, հիվանդանոցում մահացել էր: