Այսօր հայտնի մեդիափորձագետները, (ես չգիտեմ, թե ինչ է նշանակում «մեդիափորձագետ» բառը) փորձեցին «սխալ հանել» ԱԺ-ում ընդվզած լրագրողների արարքը: Ասում են՝ էթիկա են խախտել: Նրանց չի էլ հետաքրքրում, թե ինչ արեց ԱԺ-ն մեր Սահմանադրության հետ, թե ինչպես հանրապետական կուսակցությունն իրեն օրենքից դուրս համարելով՝ ինչ ուզեց արեց: 
Փորձագետներից մեկը նույնիսկ ասեց, որ երկրներ կան, որտեղ խմբագիրները վերաբերմունք արտահայտող լրագրողին ազատում են աշխատանքից: Նա չի ուզում ասել, որ այդ երկրներում նման խորհրդարան ու նման պատգամավորներ չկան: Եւ այդ երկրներում իրենց երկրի ճակատագիրը չեն հանձնել Լֆիկին, Շմայսին, գեներալ Սարոյանին կամ եսիմ էլ ում: Ու հիմա էս մարդկանց քվեարկությամբ մենք պիտի ապրենք, նրանց գծած ուղով մեր զավակները պիտի ապրեն: 
Կարծիքն հայտնողներից մեկի եղբայրը այդ պահին նստած էր լրագրողների համար նախատեսված օթյակում, նա եկել էր սատարելու օրենքը խախտողներին, նա գեներալ Մանվելի հետ էր եկել: Եւ տեսակետ հայտնողը լավ կլինի էթիկայի հարցի քննարկումը սկսի այս կետից: 
Էթիկայի մասին խոսում են, երբ կա օրինական ճանապարհով ձեւավորված իշխանություն: 
Ու հիմա քննարկում եք՝ էթիկան խախտե՞լ են լրագրողները այսօր ԱԺ-ում, թե՝ ոչ: Իհարկե, խախտել են: Բայց նրանք չէին կարող չխախտել այդ էթիկան, ինչպես չխախտես էթիկան, երբ այդ ամենից ընդամենը րոպեներ հետո մի «համբալ» պատգամավոր, հարց տվող լրագրողին «կազյոլ» է ասում:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել