Արսեն Թորոսյանի ներողությունը «չլսվեց», իմ դիտարկմամբ՝ մարդիկ չուզեցին էլ լսել այն, քանի որ առողջապահության նախարարի պահվածքը, հայտարարությունները խիստ հակասական էին ու ազդեցին ոչ միայն իր, այև ողջ պետական համակարգի վարկանիշի վրա: Հազար անգամ խոսվել ու քննադատվել են վիրուսի մասին նրա արտահայտված մտքերը, ու հիմա, ժողովրդական լեզվով ասած, բանը բանից անցել է, ու արդեն ուշ է: Արսեն Թորոսյանն ինձ համար նման է պարտված բանակի գլխավոր շտաբի պետի, ով ոչ միայն չի կատարել իր առջև դրված խնդիրները, ինչը հանգեցրել է անդառնալի կորուստների, այլև սկսել է խիստ բացասական ընկալվել, նրա խոսքը կարծես ագրեսիայի քարոզ լինի, կարծես մունաթ լինի հենց իր մեղքով «պարտված զինվորների» վրա: Ներքին համոզմունք ունեմ, որ նա ինքնակամ կհեռանա, ու շատ հավանական է, որ երկրից կարտագաղթի: Ի դեպ, Իտալիայում մարդիկ դիմել են դատախազություն, որպեսզի քննի պետության գործողությունները կորոնավիրուսի տարածման դեմ պայքարում․ կարծես թե սկսվելու են իրավական գործընթացներ ու ոչ միայն Իտալիայում: Վիրուսն, անշուշտ, բերելու է քաղաքական հետևանքներ, մեր դեպքում դա կլինի հատկապես հաջորդ իշխանությունների օրոք․ սա ցույց է տալիս պատմությունը:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
