Ուզբեկներն այսպիսի մի ասացվածք ունեն․ «Եթե մեռնել, ապա միայն փլավից»։ Եվ նրանց կարելի է հասկանալ, չէ՞ որ ճիշտ պատրաստված ուզբեկական փլավն անկրկնելի է և համին ու բույրին դիմանալն անհնար է։
Այս կերակրատեսակի արմատները մ․թ․ա․ II-III դարերին են հասնում։ Իսկ ժամանակակից տարբերակով այն հայտնվել է արդեն XVII դարում։ Այն շատ տարատեսակներ ունի։
Անհրաժեշտ բաղադրիչներ
- Բրինձ – 1 կգ
- Սոխ – 4 հատ
- Ոչխարի միս – 1 կգ
- Գազար – 1 կգ
- Բուսայուղ – 300 մլ
- Սխտոր – 2 հատ
- Կարմիր պղպեղ – 2 հատ
- Քիմիոն – 1 ճ/գ
- Ծորենի (բարբարիս) – 1 ճ/գ
- Համեմի սերմ – 1 թ/գ
- Աղ – ըստ ճաշակի
Պատրաստման եղանակը
1․ Բրինձը մի քանի անգամ լավ լվացեք, որ ջուրը թափանցիկ դառնա։
2․ Սխտորի վրայի շերտերը մաքրեք, բայց սխտորն ամբողջական թողեք, պճեղների մի բաժանեք։
3․ 3 հատ սոխ մաքրեք և կիսալուսնաձև կտրատեք։ Այնուհետև մաքրեք գազարը և ձողիկներով կտրատեք։
4․ Չուգունից կաթսան տաքացրեք և մեջը լավ տաքացրեք բուսայուղը։ Բուսայուղի մեջ մեկ հատ սոխ գցեք առանց մաքրելու։ Հանեք այն ժամանակ, երբ կսևանա։
5․ Հիմա կաթսայի մեջ լցրեք կտրատած սոխը և մոտ 10 րոպե տապակեք, մինչև ոսկեգույն կդառնա։
6․ Ոչխարի միսը լվացեք և խորանարդիկներով կտրատեք։ Լցրեք սոխի վրա և տապակեք, մինչև ոսկեգույն խրթեշ կհայտնվի։
7. Ավելացրեք գազարը և տապակեք մսի և սոխի հետ առանց խառնելու, մոտ 3 րոպե։ Դրանից հետո բաղադրիչները խառնեք և ևս 10 րոպե տապակեք։ Եռացրած ջուր ավելացրեք, որը պետք է բաղադրիչներից 1 սմ բարձր լինի։
8․ Ավելացրեք կծու կարմիր պղպեղը, կրակն իջեցրեք և մոտ 1 ժամ շոգեխաշեք։
9․ Խառնեք աղացած քիմիոնը համեմի սերմի հետ և լցրեք մսի վրա։ Աղ արեք, կրակն իջեցրեք և եփեք, մինչև գազարը կփափկի։
10․ Բրինձը նորից լվացեք և լցրեք մսի վրա, հավասարեցրեք։ Կրակը բարձրացրեք և մսի ու բրնձի վրա եռացրած ջուր լցրեք այնպես, որ 3 սմ բարձր լինի կաթսայի պարունակությունից։
11․ Երբ բրինձը ջուրը քաշի, ավելացրեք սխտորի գլուխները։ Հետո փայտիկով փլավի մեջ մի քանի անցք արեք։
12․ Փլավը կափարիչով ծածկեք, կրակը լավ իջեցրեք և ևս կես ժամ եփեք, մինչև բրինձը լրիվ պատրաստ կլինի։
