Past.am-ը գրում է.

Լեգենդն ասում է, որ Էդիթ Ջովաննա Գասսյոնը, ով հետո պետք է դառնար հռչակավոր երգչուհի Էդիթ Պիաֆ, ծնվել է փողոցում, Փարիզի աղքատ թաղամասերից մեկում։

«Երբ ցավերը բռնել են, մայրս իջել է փողոց՝ այնտեղ սպասելու շտապօգնության մեքենային, որի հետեւից գնացել էր հայրս։ Երբ շտապօգնությունը եկել է, ես արդեն ծնվել էի՝ հենց փողոցում։ Մորս օգնել էին ծննդաբերել երկու ոստիկան, ովքեր անցնելիս էին եղել այդ պահին նրա կողքով»,- պատմել է Պիաֆը։ Միֆ է սա, թե իրականություն, չգիտենք, նրա ծննդյան վկայականում գրված է եղել, որ նա հիվանդանոցում է լույս աշխարհ եկել։

Այսօր՝ դեկտեմբերի 19-ին, անկրկնելի Պիաֆի 100-ամյակն է, ինչի կապակցությամբ տարբեր երկրներում միջոցառումներ տեղի կունենան։

Պիաֆը եւ հրաշքը

Պիաֆի տատիկը հասարակաց տուն ուներ, եւ աղջիկը ողջ մանկությունն անց է կացրել մարմնավաճառուհիների շրջապատում։ Մանուկ հասակում Պիաֆը կուրացել է, եւ որպեսզի բուժեն նրան՝ ամբողջ հասարակաց տան կազմով ուխտագնացության են գնացել՝ Սուրբ Թերեզայի եկեղեցի։ Ամբողջ օրը նրանք աղոթել են, դա օգոստոսի 19-ին։ Նրանք աղոթում էին, որ ամսի 25-ին՝ Սուրբ Լյուդովիկոսի օրը, երեխան կրկին սկսի տեսնել։

25-ին ողջ օրը բոլորը հրաշքի էին սպասում, եւ երեկոյան, երբ շատերը հույսները կորցրել էին, Էդիթն ասաց՝ այն, ինչ ես տեսնում եմ, այնքան գեղեցիկ է։ Առաջին բանը, որ նա տեսել էր՝ հրաշքով բուժվելուց հետո, դաշնամուրն էր։ Այդ օրվանից Պիաֆը Սուրբ Թերեզային իր պահապանն էր անվանում։

Պիաֆը եւ երգը

Էդիթի հայրը փողոցային աճպարար էր։ Նա մարդկանց առաջ աճպարարություն էր անում, իսկ Էդիթը, ափսեն ձեռքին, մոտենում ու փող էր հավաքում։ Հայրն ասում էր՝ որպեսզի ձեզ շնորհակալություն հայտնենք, աղջիկս վտանգավոր թռիչք կանի։ Եւ երբ բոլորը սպասում էին թռիչքին, նա բարկացած ասում էր՝ մի՞թե դուք ուզում եք, որ ձեր հաճույքի համար երեխան կոտրի վիզը։ Եւ թռիչքի փոխարեն աղջիկը երգում էր։ Հենց այդպես էլ սկսվեց նրա կարիերան։ Սկզբում Պիաֆը երգում էր փողոցում, որտեղ մի անգամ նրան լսեց գիշերային ակումբի տնօրեն Լուի Պեպպեն եւ առաջարկեց, որ գա իր ակումվում երգելու։ Նա Էդիթին անվանեց La Môme Piaf՝ փոքրիկ թռչնակ, քանի որ աղջկա հասակն ընդամենը 142 սմ էր։ Այստեղից սկսվեց նրա վերելքը։

Պիաֆն ու տղամարդիկ

«Ես գիտեմ, որ ես սուրբ չեմ, իմ մատները չեն հերիքի, որպեսզի հաշվեմ սիրեկաններիս։ Շատ հեշտ է իմ ուղղությամբ քար նետել, սակայն ես փնտրում էի մեկին, ում վրա կարող եմ հենվել։ Եթե ես ձեռքից ձեռք եմ անցել, ապա ոչ թե, որ անբարոյական եմ, այլ որովհետեւ սեր էի փնտրում, որը շուռ կտար իմ կյանքը»,- ասել է Պիաֆը։

Պիաֆն իսկապես շատ սերեր է ունեցել, ողբերգական, ծանր հետեւանքներով։ Սիրեկաններից մեկից երգչուհին դուստր է ունեցել, ով, սակայն, մանուկ հասակում մահացել է մինինգիտից։ Երգչուհին այլեւս երեխա չի ունեցել, քանի որ առանձնապես չէր էլ ցանկանում երեխա։ Սիրեկաններից մեկն անգամ կրակել է Էդիթի վրա, որպեսզի սպանի նրան, քանի որ երգչուհին լքել էր նրան։

Էդիթի մեծագույն սերն է եղել բոքսի աշխարհի չեմպիոն Մարսել Սերդանը։ Նրանց սիրավեպը սկսվել է 1948 թվականին, երբ Սերդանը կին եւ 3 երեխա ուներ։ Սակայն մեկ տարի անց, երբ Սերդանը Փարիզից Նյու Յորք էր թռչում՝ Էդիթի համերգին ներկա լինելու համար, ինքնաթիռն ավիավթարի ենթարկվել, ու տղամարդը մահացավ։

Սիրելիի մահը Պիաֆն անչափ ծանր տարավ, քիչ էր մնում՝ ինքնասպան լինի։

«Ես այնքան սաստիկ էի տանջվում, որ երբեք այդքան հզոր բառեր չեմ գտնի՝ այդ մասին պատմելու համար»,- ասել է Պիաֆը։

Պիաֆը եւ մահը Էդիթ Պիաֆը մահացավ 1963 թվականի հոկտեմբերի 11-ին, ընդամենը 47 տարեկանում։ Սակայն նա չափից ավելի մեծ էր երեւում այդ ժամանակ՝ ալկոհոլն ու թմրանյութերը քայքայել էին նրան։ Իսկ դրանցով նա սկսեց տարվել Մարսելի մահվանից հետո։ 1951-1963 թվականների ընթացքում Պիաֆը տարել է 4 ավտովթար, ինքնասպանության մեկ փորձ, 3 կոմա, 4 անգամ բուժվել է թմրանյութերից կախվածությունից, սպիտակ տենդի 2 նոպա է ունեցել, 7 վիրահատություն, 2 թոքաբորբ։ Մահվանից քիչ ժամանակ առաջ նրա մոտ օնկոլոգիական հիվանդություն է հայտնաբերվել։ Պիաֆի թաղմանը Փարիզի փողոցներ էին դուրս եկել 100 հազար մարդ։ Մեքենաների շարժը քաղաքում կանգ էր առել։ Կաթոլիկ եկեղեցին հրաժարվեց անցկացնել երգչուհու հոգեհանգիստը, քանի որ նա «ապրում էր մեղքի մեջ»։

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել