Ասում են, որ ոսկե ձկնիկները իրականացնում են երեք ցանկություն 
Բայց արի ու տես, որ այս հեծանվորդի մեջքի հետևում, հեծանվի նստարանին ամրացված հարմարանքից կախված տոպրակների մեջ մի խումբ այդպիսի ոսկե ձկներ են: Հարավարևելյան քաղաքներից մեկի այս բնակիչը իր հեծանվով շրջում է և վաճառում զույգ ոսկե ձկնիկներ: Մի կողմից հեքիաթն է, առասպելն է այն մասին, որ ոսկե ձկնիկները կախարդական են, մյուս կողմից իրական կյանքի իրական դրվագ է, երբ «երազանք իրականացնող» փոքրիկ այս արարածներին վաճառում են սովորական ապրանքի պես: Մի՞թե կյանքը կարելի է վաճառել, դնել այսպես տոպրակի մեջ, կապել մեջքից ու շրջել քաղաքով մեկ` ասես վաճառում ես գրիչ, օրացույց կամ էլ կարկանդակ: Ամեն մի տոպրակում մի զույգ երազանք: Ահա և կյանքը իր ողջ ներկապնակով. հեծանիվ` սոցիալապես ոչ այնքան ապահով իր հեծանվորդով, ապրուստը հոգալու ամենօրյա խնդիր և տոպրակի միջի ոսկե ձկնիկներ, որոնք կոչված են իրականացնելու մեր ամենանվիրական երազանքները, որպեսզի նույն այդ կյանքը լինի ավելի բարեկեցիկ ու լուսավոր, չունենանք ապրուստը հոգալու կարիք, չունենանք քաղաքում ստիպված հեծանվով այսպես շրջելու և մեր երազանքը վաճառելու խնդիր: Ինչ մեղք են ոսկե ձկնիկները, որոնք հայտնի չէ, թե ինչ տներում կգտնեն իրենց հանգրվանը, ո՞ղջ կմնան, թե՞ կսատկեն` իրենց գնած նորահայտ տիրոջ անտարբերությունից կամ էլ անտեղյակությունից: Ափսոս: Եվ ափսոս, որ մենք` մարդիկ, մեր ապրուստը հոգալու համար երբեմն ստիպված ենք լինում վաճառելու մեր երազանքները, հրաժարվելու դրանցից…
