Ամեն ինչ պետք է տեղի ունենա իրավական դաշտում, օրենքի շրջանակներում։ Այս մասին Գյումրիում լրագրողների հետ զրույցում ասաց ՀՀ նախագահ Վահագն Խաչատուրյանը` անդրադառնալով նախօրեին Բաղրամյան պողոտայում ոստիկանների և «Տավուշը հանուն հայրենիքի» ակցիայի մասնակիցների միջև տեղի ունեցած բախումներին։
Նրա խոսքով՝ իրավապահները ստիպված են եղել ուժ կիրառել ցուցարարների նկատմամբ։
«Մենք շատ անգամներ զգուշացրել ենք այն մարդկանց, որոնք կազմակերպել են միտինգները` զե՛րծ մնացեք ավելորդ լարվածությունից, առավել ևս, իշխանության ներկայացուցիչների նկատմամբ օրինազանցություն մի՛ արեք, բայց, ցավոք սրտի, իրենց պահվածքն այլ էր, և ուժային կառույցները ստիպված էին անել այն գործողությունը, որը պարտավոր էին անել»,–ասաց Խաչատուրյանը։
ՀՀ նախագահը վստահեցրեց, որ իշխանությունը, օրենսդիր և գործադիր մարմիններն իրականում հակված չեն որևէ քաղաքացու ուժով կարգի հրավիրելու։
«Իմ խնդրանքն է բոլորին, որպեսզի իրենք մեզ և ոստիկանությանն այդպիսի իրավիճակի առաջ չդնեն։ Մենք, որպես ժողովրդավարական երկիր, իրականում ուզում ենք` ամեն ինչ տեղի ունենա օրենքի շրջանակում։ Ցավոք սրտի, այսօրվա միտինգի կազմակերպիչները լրիվ այլ տրամաբանության մեջ են աշխատում։ Իրենց չի բավարարում, որ երկրում վիճակը խաղաղ է»։