Ուկրաինայի անվտանգության ծառայությունը խուզարկել է պաշտպանության նախարարության պաշտոնյաների և «Լվովի Արսենալ» ընկերության ղեկավարներին: Ըստ քննիչների՝ նրանք գրեթե մեկուկես միլիարդ գրիվնա (39,6 միլիոն դոլար) են գողացել արկերի գնման գործարքից։ Այս մասին հայտնում է Страна.ua-ն:
«Հանցագործության փաստագրումը տեղի է ունեցել ներկայիս պաշտպանության նախարարի աջակցությամբ»,- ասվում է Անվտանգության ծառայության հաղորդագրությունում։
Գործարքում ներգրավված են ՊՆ նախկին և ներկա պաշտոնյաներ, փոխկապակցված ընկերությունների ղեկավարներ։ Գումարը յուրացվել է Ուկրաինայի զինված ուժերի համար 100 հազար արկ գնելու գործընթացում։
2022 թվականի օգոստոսին պաշտոնյաները պայմանագիր են կնքել «Լվովի Արսենալ»-ից հրետանային արկերի մեծածախ խմբաքանակ գնելու համար։ Այնուհետև ՊՆ-ն ստորագրված փաստաթղթով նախատեսված ամբողջ գումարը փոխանցել է ընկերության հաշվեհամարներին։ Միջոցները ստանալուց հետո ընկերության ղեկավարությունը գումարի մի մասը փոխանցել է արտասահմանյան առևտրային կառույցի հաշվեկշռին, որը պետք է պատվիրված զինամթերքը մատակարարեր Ուկրաինային։
Սակայն ընկերությունը ոչ մի հրետանային արկ չի ուղարկել, իսկ ստացված միջոցները ստվերային գոտի է մտցրել՝ փոխանցելով դրանք Բալկաններում գտնվող մեկ այլ կից կառույցի հաշվեհամարներին։
Գողացված դրամական միջոցները կալանքի տակ են, որոշվում է դրանք Ուկրաինա վերադարձնելու հարցը։
Այս գործով կասկածվում են ՊՆ ռազմատեխնիկական քաղաքականության վարչության նախկին և ներկա ղեկավարները, «Լվովի Արսենալ»-ի ղեկավարն ու կոմերցիոն տնօրենը, ինչպես նաև արտասահմանյան ընկերության ներկայացուցիչը։
Կասկածյալներից մեկը բերման է ենթարկվել Ուկրաինայից հեռանալու փորձի ժամանակ, նա կալանքի տակ է։ Մնացածի համար կանխարգելիչ միջոցառումների հարցը այժմ լուծվում է։ Նրանց սպառնում է մինչև 12 տարվա ազատազրկում՝ գույքի բռնագրավմամբ։
