Հետխորհրդային տարածքի քայքայումը ՆԱՏՕ-ի և նրա դաշնակիցների գլխավոր նպատակներից է։ Այս մասին Բելառուսի նախագահ Ալեքսանդր Լուկաշենկոն հայտարարել է ԱՊՀ անդամ պետությունների անվտանգության մարմինների և հետախուզական ծառայությունների ղեկավարների հանդիպմանը։
Նրա խոսքով՝ հետխորհրդային տարածքում այսօր բավականին հակասություններ կան, ուստի պետք է ուժ լինի նաև սխալները շտկելու և հին խնդիրները լուծելու համար, գրում է tvr.by կայքը։
«Այո, մենք ինչ-որ տեղեր սխալներ ենք թույլ տվել։ Այո, ինչ-որ տեղ չի ստացվել՝ Հայաստանում, Ադրբեջանում։ Եկեք սա շտկենք», - ասել է Լուկաշենկոն:
Բելառուսի նախագահն ընդգծել է, որ այս հակամարտության սրումը չէր լինի, եթե կողմերը ժամանակին լսեին խորհուրդները և ձեռնարկեին անհրաժեշտ միջոցներ։ Նա ընդգծել է, որ տեղի ունեցածի համար Հայաստանի ներկայիս վարչապետ Նիկոլ Փաշինյանը մեղավոր չէ. ըստ Լուկաշենկոյի՝ Փաշինյանը ստեղծված իրավիճակը «ժառանգել» է։
Լուկաշենկոն հիշեցրել է, որ նախկինում կոչ էր արել երկրներին ամեն ինչ լուծել խաղաղ ճանապարհով, և քննարկվել էին փոխադարձ ընդունելի կոնկրետ միջոցներ։ Սակայն նախնական պայմանավորվածությունները այդպես էլ կյանքի չեն կոչվել, և հիմա թե՛ Հայաստանի, թե՛ Ադրբեջանի համար հեշտ չէ, շարունակել է նա:
«Կներեք, որ հրապարակավ այս մասին ասում եմ: Այն ժամանակ հայտնվել էի Ալիևի և Սարգսյանի միջև և առաջարկեցի.«Տղաներ, պետք է ինչ-որ կերպ հարցը լուծել»... Եթե համաձայնեին, այս պատերազմը սկսելու պատճառ էլ չէր լինի, մենք ամեն ինչի շուրջ կպայմանավորվեինք, ինչո՞ւ չարեցին և արդյունքում ի՞նչ ստացան... Հայաստանի համար ավելի լա՞վ է, ո՛չ, Ադրբեջանի համար էլ հեշտ չէ, Իլհամն այս հարցում խելացի մարդ է»,- ասել է Բելառուսի ղեկավարը:
