Auroranews.am-ը գրում է․
Մամուլում տեղեկություն է տարածվում այն մասին, որ Վարչապետին սպասարկող թիվ մեկը բորտն անհետացել է: «Փաստինֆո» լրատվականը գրում է, որ արդեն շուրջ երկու ամիս է, ինչ անհետացել է Նիկոլ Փաշինյանին սպասարկող կառավարական օդանավը՝ թիվ մեկ բորտը, իսկ կառավարությունն ու Քաղավիացիան ուղղակի հրաժարվում են տեղեկություն տրամադրել։
Auroranews.am-ը կապ հաստատեց Քաղավիացիայի կոմիտեի նախագահի մամուլի հարցերով օգնական Լիլիթ Աղաբեկյանի հետ:
Վերջինս մեզ հետ զրույցում նշեց, որ Վարչապետին սպասարկող թիվ մեկը բորտը չի անհետացել, ինչպես բազմիցս հայտնել են, օդանավը գտնվում է տեխնիկական զննման մեջ։ Այդ գործընթացը կազմակերպում և վարում է Հայաստանի պետական պահպանության ծառայությունը: Խոսնակը վստահեցրեց, որ թեմայի վերաբերյալ բարձրացված աղմուկն անհիմն է, չկա անհանգստանալու որևէ պատճառ կամ որևէ արտառոց բան:
Հարցին, թե որտեղ է օդանավը, երբ կավարտվեն աշխատանքները, հստակ պատասխանել չի կարող:
«Քանի որ ՊՊԾ-ն է կազմակերպում տեխզննումն ապա առավել մանրամասն տեղեկատվություն կարելի է ստանալ տվյալ ծառայությունից: Շատ շուտով կավարտվի տեխնիկական զննումն ու կառավարական օդանավը շատ շուտով կվերադառնա, ես տեղյակ եմ, որ գործընթացն արդեն ավարտին է մոտենում»,- հավելեց Լիլիթ Աղաբեկյանը:
Հիշեցնենք, որ ապրիլ-մայիս ամիսներին Նիկոլ Փաշինյանը երկու պաշտոնական ուղեւորություն է ունեցել՝ Ռուսաստան, ապա նաեւ Նիդերլանդներ, որոնց ժամանակ օգտվել է «Armenia» ավիաընկերությանը պատկանող օդանավից։ Այս ամբողջ ընթացքում թիվ 1 բորտը գտնվել է և հիմա էլ շարունակում է գտնվել տեխզննման փուլում:
