Կյանքում ամեն ինչ ունի իմաստ, էություն, ուղերձ։ Վարչապետի գործողությունները և հատկապես անգործությունը վկայում են, որ նա զբաղված է ոչ թե երկրի, հասարակության, քաղաքացու խնդիրներով, այլ բացառապես միայն սեփական անձի և սեփական իշխանության պահպանմամբ։
Վարչապետը պետք է այցելած լիներ սոցապ նախարարություն, քանզի տասնյակհազարավոր մարդիկ հրատապ կարգով օժանդակության խնդիր ունեն, և կարիքների գնահատման, բյուջետային վերաբաշխումների, պետության ու հասարակության ջանքերը կոնսոլիդացնելու կարիք կա։
Վարչապետը պետք է այցելեր պաշտպանության նախարարություն, առողջապահության նախարարություն, որովհետև հազարավոր վիրավորներ ու կորոնավիրուսով վարակվածներ այսօր անհապաղ բուժօգնության կարիք ունեն, ու առողջապահական համակարգն օպերատիվ կառավարման կարիք ունի։
Վարչապետը պետք է այցելեր միգրացիոն ծառայություն, որովհետև տասնյակհազարավոր փախստականներ կան, ու նրանց կեցության ու սոցիալական խնդիրները անհետաձգելի լուծումների կարիք ունեն։
Վարչապետը պետք է այցելեր կրթության նախարարություն, որովհետև տասնյակհազարավոր երեխաների ուսուցման պրոցեսը բառիս բուն իմաստով անորոշ վիճակում է, իսկ գաղթական դարձած հազարավոր երեխաների դեպքում պրոցեսը պարզապես ընդհատված է։
Վարչապետը պետք է այցելեր մշակույթի նախարարություն՝ հասկանալու համար՝ մշակութային ժառանգության ինչ հատված է հայտնվել ոչնչացման ու կորստի եզրին, դրա որ մասը կարելի է փրկել և ինչպես։
Վարչապետը պետք է այցելեր Սյունիքի մարզ՝ հասկանալու համար Գորիս-Կապան ճանապարհն ինչ ռիսկի գոտում է, ինչ լրացուցիչ անվտանգության միջոցառումների կարիք կա։
Ու այսպես բազմաթիվ անելիքներ։
Պետության ու քաղաքացու ճակատագրով մտահոգ ցանկացած ղեկավար ստեղծված իրավիճակում պետք է առանց հապաղելու, օպերատիվ ու տքնաջան աշխատանք տաներ ճգնաժամի հաղթահարման ուղղությամբ։
Մինչդեռ Նիկոլ Փաշինյանը վերջին երեք օրվա ընթացքում ընդամենը այցելել է Ազգային անվտանգության ծառայություն և արտգործնախարարություն։
Այսկերպ գործող վարչապետի ուղերձը մեկն է՝ հպարտ ժողովուրդ, քո խնդիրներով ինքդ զբաղվիր, իմ միակ մտահոգությունն իմ անվտանգությունն է, իշխանությունը և դրսից դրանց տրվելիք երաշխիքները։
