Razminfo-ն գրում է.
Թուրքական պետական «Անադոլու» լրատվական գործակալությունը տեղեկություն էր տարածել, թե Հայաստանից կրակ են բացել հովիվի վրա, ով փորձել է Թուրքիայից անցնել Հայաստանի տարածք՝ իր անասուններին հետ բերելու համար։
Ըստ թուրքական աղբյուրի՝ դեպքը եղել է Կարսի նահանգի Աքյաքա բնակավայրի մոտակայքում։
35-ամյա Մուսթաֆա Ուլքերը, ով զբաղվում է հովվությամբ, վիրավորվել է հայաստանյան կողմի սահմանապահների արձակած կրակից և տեղափոխվել հիվանդանոց. նրա վիճակը գնահատավում է նորմալ։
Թուրքական և ադրբեջանական լրատվամիջոցները, անդրադառնալով այս տեղեկությանը, նշել են, թե «կրակն արձակել են Հայաստանի զինված ուժերի զինծառայողները»։
Իրականում, հայտնի է, որ սահմանի այս հատվածը հսկում են Ռուսաստանի ԱԴԾ-ի սահմանապահ ուժերը։
Ռազմ.ինֆոն կապ հաստատեց Հայաստանում ՌԴ ԱԴԾ սահմանապահ ուժերի Հայաստանի վարչության հետ։
Վարչությունից մեզ պատասխանեցին, որ սահմանին միջադեպ գրանցվել է, այժմ ընթանում է քննություն, որի ավարտից հետո մանրամասների վերաբերյալ հավելյալ տեղեկություն կտրվի։
Նշենք, որ նախկինում ևս հայ-թուրքական սահմանին նման միջադեպեր գրանցվել են։