Քաղաքով մեկ տեղակայված սգո ծառայություններն ու սրահները, մեղմ ասած, արդեն լցրել են քաղաքացիների համբերության բաժակը:
Ներկայումս Երևանի կենտրոնում կան մի շարք փողոցներ, որտեղ տեղակայված սգո սրահների պատճառով տվյալ փողոցներով գրեթե ամեն օր թաղման թափոր է անցնում, որին էլ հետո հաջորդում է հոգեհանգստի արարողությունը: Ու անկախ քաղաքացիների ու տվյալ թաղամասի բնակիչների ցանկությունից՝ վերջիններս անընդհատ ստիպված են լինում ականատես լինել այդ տխուր արարողություններին:
Հաշվի առնելով այս հանգամանքն ու քաղաքացիների արդարացի դժգոհությունները՝ վերջերս կառավարությունը հավանություն է տվել «Երևան քաղաքում տեղական ինքնակառավարման մասին» օրենքներում փոփոխություններ և լրացումներ կատարելու օրենքների նախագծերի փաթեթին, որով առաջարկվում է կանոնակարգել հոգեհանգստի ծառայության իրականացմանն առնչվող մի շարք հարցեր:
Նշենք, որ օրերս ավագանին միաձայն հավանության է արժանացրել Երևան համայնքի վարչական տարածքում գտնվող քաղաքացիական հոգեհանգստի ծիսակատարության ծառայությունների մատուցման համար նախատեսված շենքերին և շինություններին ներկայացվող սահմանափակումները, պահանջները և պայմանները կանոնակարգող որոշման նախագծը, որի համաձայն՝ կանոնակարգվում են նշված ծառայությունների իրականացման համար թույլտվություն ստանալու կարգը, այդ ծառայությունների մատուցման համար նախատեսված շինությունների գտնվելու թույլատրելի վայրերն ու շինությունների և համապատասխան ծառայությունների մատուցման համար առաջադրվող պարտադիր պայմանները:
Հարկ է նշել, որ ավագանու նիստի քննարկմանը դրված սահմանափակումներից հետո որոշ հոգեհանգստի սրահներ, օրենքում նշված պահանջներին չհամապատասխանելու պատճառով, կարող են ընդհանրապես դադարեցնել իրենց գործունեությունը:
Չնայած սգո սրահների սեփականատերերի բողոքներին՝ ամեն դեպքում պետք է փաստել, որ քննարկվելիք օրենքը կարող է բավականին դրական տեղաշարժ արձանագրել տվյալ ոլորտում` շարքային քաղաքացիներին զերծ պահելով թաղման տհաճ տեսարաններից ու հոգեբանական ցնցումներից:
