Իրանի ազգային անվտանգության գերագույն խորհրդի քարտուղար Ալի Լարիջանին ընդունել է Ռուսաստանի Դաշնության փոխվարչապետ Վիտալի Սավելևին։
Այս մասին հայտնում է Tasnim գործակալությունը։
Հանդիպման հիմնական թեման Հյուսիս-Հարավ տրանսպորտային միջանցքի նախագծի իրականացումն էր, ինչպես նաև փոխադարձ հետաքրքրություն ներկայացնող մի շարք հարցեր։
«Կարճ ժամանակահատվածում բոլոր առկա վարչական և ինստիտուցիոնալ խոչընդոտները կվերացվեն, և կկնքվեն անհրաժեշտ համաձայնագրեր՝ Հյուսիս-Հարավ միջանցքի համար իրավական և վարչական կայունություն ապահովելու համար»,- նշել է Լարիջանին։
Նա նաև նշել է, որ Իրանի նախագահ Փեզեշքիանի շարունակական հետևողականության շնորհիվ կառավարությունը մինչև տարեվերջ ձեռք կբերի միջանցքի երթուղու երկայնքով գտնվող ողջ հողատարածքը, որպեսզի նախագիծը անխափան և սահուն առաջ ընթանա։
Հանդիպման ընթացքում Ռուսաստանի փոխվարչապետը ողջունել է Իրանի վճռական մոտեցումը և հայտարարել Մոսկվայի պատրաստակամությունը նախագիծը արագացնելու և այն շահագործման հանձնելու համար։
Կողմերը հաստատել են, որ Հյուսիս-Հարավ միջանցքը Իրանի և Ռուսաստանի համատեղ ռազմավարության մի մասն է՝ ամրապնդելու կայուն համագործակցությունը և ստեղծելու տարածաշրջանային կապի անկախ երթուղիներ։
2023 թվականին Ռուսաստանը և Իրանը Հյուսիս-Հարավ նախագծի շրջանակներում համաձայնագիր են ստորագրել Ռեշտ-Աստարա մայրուղու 160 կիլոմետրանոց հատվածի համատեղ կառուցման մասին, որը նախատեսված է Պարսից ծոցի նավահանգիստներ մուտք ապահովելու համար։ Նախագծի ընդհանուր արժեքը կազմում է 1,6 միլիարդ եվրո։ Մոսկվան և Թեհրանը համատեղ կֆինանսավորեն ապրանքների և ծառայությունների նախագծումը, շինարարությունը և մատակարարումը։