Ինչ վիճակ է սև շուկայում. որքան են վաճառում այսօրվա խաղի տոմսերը

Hraparak.am-ը գրում է․

Ֆուտբոլի աշխարհի առաջնության եվրոպական գոտու ընտրական մրցաշարում շարունակվում են հանդիպումները։ Սեպտեմբերի 9-ին Հայաստանի ազգային հավաքականը կանցկացնի երկրորդ տուրի իր խաղը՝ Երևանում ընդունելով Իռլանդիայի հավաքականին։

Այս հանդիպումը կարևոր նշանակություն ունի մեր ընտրանու համար, քանի որ ընտրական փուլում յուրաքանչյուր միավոր վճռորոշ է մրցաշարային դիրքերի համար։

Այս հանդիպման տոմսերը, ինչպես հայտնի է, նույնպես սպառված են: Սակայն , ինչպես Պորտուգալիայի հետ խաղի դեպքում, այս անգամ ևս տոմսերը սև շուկայում ակտիվորեն վաճառվում են: Տոմսերի վերավաճառքի ամենաակտիվ հաթակում՝ Viagogo-ում, տոմսերն արժեն 28 հազար, 35 հազար, 40 հազար դրամ:

Սոցցանցերում գներն անհամեմատ ավելի հարմար են, օգտատերերից ոմանք, օրինակ, երկու տոմսի համար պահանջում են 30 հազար դրամ: Այս տոմսերը սակայն հարավային ու հյուսիսային տրիբունաների տոմսեր են, որոնք , հայտնի է , ամենաէժանն են, այն կարելի էր ֆեդերացիայի կայքից գնել հազարից երեք հազար դրամով: