Ուկրաինայի ԶՈւ-ն հարվածել է Տոկմակ քաղաքին. 10 մարդ մահացել է, նրանցից 3-ը երեխա է
21:41 , 13 ապրիլ, 2024Tert.am-ը գրում է.
Ուկրաինայի ԶՈւ-ի կողմից Զապորոժիեի մարզի Տոկմակ քաղաքի բնակելի հատվածի գնդակոծության հետևանքով զոհերի թիվը հասել է 10-ի, այդ թվում 3 երեխա կա։ Այս մասին հայտնել է Զապորոժիեի մարզի ղեկավար Եվգենի Բալիցկին։
Նրա խոսքով՝ երկու մարդ անհետ կորած է համարվում։ Եվս 13 տուժած հոսպիտալացվել է։ Որոնողական աշխատանքները շարունակվում են։
Ռուսաստանի քննչական կոմիտեն հայտարարում է, որ ՌԴ ՔԿ քննիչները կպարզեն տեղի ունեցածի հանգամանքները, բոլոր ներգրավված անձանց գործողություններին կտրվի իրավական գնահատական:
Տոկմակը Զապորոժիեի մարզի ամենամեծ քաղաքներից է, այն գտնվում է Մելիտոպոլ քաղաքից մոտ 60 կմ հեռավորության վրա։ Հարվածի հետևանքով առանց գազամատակարարման է մնացել մասնավոր հատվածի 25 և բազմահարկ հատվածի 9 տուն։