Իրանի ԱԳՆ ղեկավարը չեղյալ է հայտարարել Ավստրիա այցը՝ պետական հաստատություններում իսրայելական դրոշների պատճառով
17:47 , 15 մայիս, 2021News.am-ը գրում է.
Իրանի արտգործնախարար Մոհամմադ Ջավադ Զարիֆը չեղյալ է հայտարարել շաբաթ օրվա իր այցը Ավստրիա՝ ավստրիական կառավարական շենքերի վրա կախված իսրայելական դրոշների պատճառով: Այս մասին շաբաթ օրը հաղորդել է Ավստրիայի արտաքին գործերի նախարարությունը, փոխանցում է ՏԱՍՍ-ը:
Արտաքին քաղաքական գերատեսչությունը հստակեցրել է, որ Զարիֆը նախատեսում էր շաբաթ օրը այցով ժամանել Վիեննա՝ Ավստրիայի արտգործնախարար Ալեքսանդր Շալենբերգի հետ բանակցելու համար, սակայն չեղյալ է հայտարարել ուղեւորությունը: «Մենք ափսոսում ենք եւ դա ի գիտություն ենք ընդունում»,- ասել է Ավստրիայի ԱԳՆ-ը:
Ուրբաթ օրը Ավստրիայի կանցլերի գրասենյակի եւ Ավստրիայի արտաքին գործերի նախարարության շենքերի վրա Իսրայելի դրոշներ են կախվել՝ ի նշան Գազայի հատվածում տեղի ունեցող իրադարձությունների հարցում Թել Ավիվի հետ համերաշխության: