Իրանի նախագահը այցելում է Իրաք
21:20 , 11 մարտ, 2019Azatutyun.am-ը գրում է.
Իրանի նախագահ Հասան Ռոհանին ժամանել է Իրաք: Սա Ռոհանիի առաջին պաշտոնական այցն է հարևան երկիր, որի իշխանություններին Միացյալ Նահանգները հորդորում է սահմանափակել կապերը Իրանի հետ:
Այցից առաջ, խոսելով Թեհրանի օդանավակայանում, Ռոհանին բարձր է գնահատել Իրանի և Իրաքի, իր խոսքով, առանձնահատուկ հարաբերությունները: «Մենք շատ ենք շահագրգռված խորացնել մեր կապերը Իրաքի հետ, հատկապես՝ տրանսպորտային համագործակցության ոլորտում», - ասել է Իրանի նախագահը:
Իրաքը փորձում է հավասարակշռել իր հարաբերությունները հարևան երկրի ու Միացյալ Նահանգների հետ, որից ֆինանսական և ռազմական օգնություն է ստանում: