Հայաստանի ՊՆ-ն նոր զինատեսակների մատակարարման շուրջ համաձայնագիր է կնքել ռուսական կողմի հետ
23:00 , 28 փետրվար, 2019Azatutyun.am-ը գրում է.
Հայաստանի պաշտպանության նախարարությունը նոր համաձայնագիր է կնքել ռուսական «ՌոսՕբորոնԷքսպորտի» և ռազմատեխնիկական համագործակցության Դաշնային ծառայության հետ՝ նոր զինատեսակների մատակարարման շուրջ:
Ըստ «Ինտերֆաքսի»՝ փաստաթուղթը ստորագրվել է պաշտպանության փոխնախարար Դավիթ Փախչանյանի՝ Մոսկվա կատարած երկօրյա այցի արդյունքում:
«Փախչանյանի գլխավորած պատվիրակությունը մասնակցել է «ՌոսՕբորոնէքսպորտի» և ռազմատեխնիկական համագործակցության Դաշնային ծառայության հետ պայմանագրերի վերջնական համաձայնեցմանն ու ստորագրմանը՝ որոշ ապրանքատեսակներ ձեռք բերելու շուրջ», - հայտարարել է Ռուսաստանի պաշտպանության նախարարությունը՝ առանց հավելյալ մանրամասների:
Պաշտոնական հաղորդագրության մեջ նաև նշվում է, որ զինատեսակների ձեռքբերման համար նոր վարկի տրամադրման հնարավորությունը գտնվում է քննարկման փուլում:
Ավելի վաղ՝ փետրվարի սկզբին, Մոսկվա էր այցելել Հայաստանի պաշտպանության նախարար Դավիթ Տոնոյանը, հանդիպել ռուս գործընկերոջ, պետական «Ռոստեխ» կորպորացիայի գլխավոր տնօրենի և ռուսական ռազմարդյուանբերական ոլորտի այլ պաշտոնյաների հետ: