Ղարաբաղյան հարցի լուծումը տնտեսապես անկախ, զարգացած ու հզոր բանակով երկիր ունենալու մեջ է
07:55 , 21 հոկտեմբեր, 2016
Գաղտնիք չէ, որ ադրբեջանական մամուլը խուսափում է լուսաբանել ներհայաստանյան յուրաքանչյուր դրական զարգացում և իրողություն, ինչի պատճառով ադրբեջանական հասարակության մի մասն ուղղակի անտեղյակ է իր համար հռչակված «թիվ 1 թշնամուց»։
ՀՀ կառավարության նոր ծրագրի մասին ադրբեջանական մամուլում (հատկապես ադրբեջանալեզու) գրեթե անդրադարձներ չկան։ Իսկ առկա մեկ-երկու հոդվածներն էլ շատ հեռու են լուրջ հրապարակում համարվելուց։
Հետաքրքիր է, որ մեզ համար այնպիսի սովորական երևույթները, ինչպիսիք են, օրինակ, կառավարության ծրագիր, Ազգային ժողովում ընդդիմության քննադատություն, առաջարկներ և այլն, խորթ են ադրբեջանցիների համար։
Պատճառները մի քանիսն են. առաջին հերթին՝ ավտորիտար վարչակարգի առկայությունը, ընդդիմադիր կենսունակ դաշտի, անկախ մամուլի բացակայությունը և այլն։
Կառավարության ծրագրում հատկապես ուշագրավ են պաշտպանության ոլորտի վերաբերյալ կետերը, որոնց իրագործումը կբերի ազգ-բանակ կապի ամրապնդմանը և զինված ուժերի մարտունակության բարձրացմանը։
Նորություն ասած չեմ լինի, եթե պնդեմ, որ Ղարաբաղյան հարցի լուծումը տնտեսապես անկախ, զարգացած ու հզոր բանակով երկիր ունենալու մեջ է։