Երկրապահ կամավորականների հետ շփման գծի հարավային մասում գտնվող Sputnik Արմենիայի թղթակից Դմիտրի Պիսարենկոն ներկայացրեց այնտեղ տիրող իրավիճակը.Տարիքավոր զինվորներն ունեն ամենակարևոր բանը` փորձ` թե՛ մարտական, թե՛ կենցաղային։ Կենցաղի ճիշտ կազմակերպումը ռազմական գործողությունների գոտում լուծում է շատ հարցեր, նշեց Sputnik Արմենիայի թղթակիցը։
Կամավորականների շարքերում կան շատ մարդիկ, որոնք անցյալում վիրավորվել են, բայց կրկին պատերազմի դաշտում են, կան պրոթեզավորված հրամանատարներ։
Կարեն անունով մեխանիկ-վարորդը պատմեց, որ մասնակցել է առաջին տանկային մարտին։ Իրենց մեքենան խոցվել է, հրամանատարը` մահացել, և ինքն ու անձնակազմի անդամները փորձել են կրակի տակից դուրս բերել իրենց զրահամեքենան։ Բայց համոզվելով, որ դա անհնար է, անցել են հարևանությամբ մարտ վարող զրահամեքենան։ Ի վերջո կարողացել են իրենց տանկը դուրս բերել կրակի տակից, Կարենը կիսաուշաթափ վիճակում նստել է ղեկին և վարել այն, կարողացել է հասնել մինչև անվտանգ գոտի` հայկական դիրքեր և գիտակցությունը կորցրել է։ Նրան տեղափոխել են հոսպիտալ։ Նա արդեն ապաքինվել է և սպասում է նոր հրամանների։
«Իմ ուշադրությունը գրավեց ևս մի կամավոր. նրա ձեռքերին գեղարվեստական դաջվածքներ կան։ Պարզվեց, որ նրա անունն Էդգար է, ԱՄՆ-ից Հայաստան է եկել երեք ամիս առաջ և իմանալով այս իրադարձությունների մասին` միանգամից որոշում է ընդունել գալ Արցախ և աջակցել մարտիկներին»,- պատմեց Sputnik Արմենիայի թղթակիցը։
Էդգարն ասել է, որ Գլենդել կվերադառնա միայն վերջնական հաղթանակից հետո։