Մենք մանդատները վայր կդնենք, բայց Փաշինյանը չպետք է մնա վարչապետի պաշտոնակատար և օգտագործի բոլոր վարչական ռեսուրսները ընտրություններում ձայներ ապահովելու համար:
Այս մասին ԱԺ ճեպազրույցների ժամանակ հայտարարել է «Հայաստան» խմբակցության պատգամավոր Արթուր Խաչատրյանը՝ անդրադառնալով ԱԺ նախագահ Ալեն Սիմոնյանի այն հայտարարություններին, որ եթե ընդդիմությունը մանդատները վայր դնի, ՀՀ-ում արտահերթ ընտրություններ տեղի կունենան։
«Ասում են 2 անգամ հրաժարական է տվել, այո, բայց մնացել է վարչապետի պաշտոնակատար նույն լծակներով, ի՞նչ տարբերություն հրաժարական է տվել, թե չի տվել։ Այդ մարդն իր թիմում մի վստահելի մարդ չունի՞, որ մի քանի օրով ասի առ կնիքը, գնա կառավարի։ Ընտրություններ, այո, պետք է լինեն, բայց ընտրության ամենակարևոր և առաջին պայմանը՝ Փաշինյանը չպետք է լինի վարչապետի ժամանակավոր պաշտոնակատար»,- ասաց նա։
Անդրադառնալով «Տավուշը հանուն Հայաստանի» շարժմանը Խաչատրյանն ասաց, որ շարժման մեջ շատ ակտիվ մասնակցություն ունի Դաշնակցությունը։
«Մենք միշտ հայտարարել ենք՝ աջակցում ենք շարժմանը, հիմա էլ կոչ ենք անում Հայաստանի ճակատագրով հետարքրքված բոլոր քաղաքական ուժերին միանալ շարժմանը, որովհետև սա իշխանության համար շարժում չէ, սա Հայաստանի տարածքային ամբողջականության, ինքնիշխանության, անկախության և հայ ժողովրդի արժանապատվության համար շարժում է»,- ասաց նա։
Նրա խոսքով՝ Շարժումը ժողովրդի ձայնն է, որով իշխանություններին ասում են՝ չեք կարողանում ապահովել մեր անվտանգությունը։
Հարցին՝ Շարժումը իշխանափոխության, Փաշինյանի հրաժարականի պահանջ չի դնում, հետագայում պահանջը կվերափոխվի, նա պատասխանեց․ «Ես հույս ունեմ՝ իրենք կհասկանան, որ չեն կարողանում լուծել ՀՀ առջև ծառացած մարտահրավերները որքան էլ ջանք են թափում։ Իրենք ասում են՝ ամեն ինչ անում են, բայց որևէ արդյունք չեն ապահովում»,- ասաց նա։
Ինչ վերաբերում է ճեպազրույցի ժամանակ ՔՊ-ականների հայտարարություններին, թե Բագրատ Սրբազանի առաջնորդած շարժումը և նրան միացած գործիչները փորձում են Հայաստանը դարձնել ծայրագավառ և փորձում են հեղաշրջում իրականացնել, նա պատասխանեց․
«Այս իշխանությունները 2 փուչիկ են փչել վերջին մի քանի տարրիների ընթացքում․ փուչիկներից մեկը որը պայթեցրեց ուրբաթ օրը Աննա Վարդապետյանը, այն է, որ որևէ օտար ուժ Հայաստանում հեղաշրջում է ուզում իրականցնել, նա հերքեց դա և ասաց՝ ընդհանրապես հեղաշրջման փորձ չի եղել։
Այս իշխանությունները հոգով սրտով բոլշևիկներ են՝ 37 թվին ում բռնում էին վրան մի հատ շպիոնի շտամբ էին խփում, որ ցույց չտան, հերքեն, որ երկրի ներսում կա իրենցից դժգոհություն, ամեն ինչը վերագրում էին օտար ուժերին։ Ես չգիտեմ՝ Հայաստանում կա՞ ուժ որն ուզում է Հայաստանը դարձնել ծայրագավառ, բայց տեսնում եմ, որ ՔՊ-ն ուզում է Հայաստանը դարձնել վիլայեթ, դրա համար հաճույքով Փաշինյանը գնացել էր Էրդողանի երդմնակալությանը նստել էր Ալիևի հետևը և նայում էր Ալիևի ծոծորակին»։
