Իրանի Արևելյան Ադրբեջան նահանգի հյուսիսում երկրորդ օրն է շարունակվում են Իսլամական հեղափոխության պահապանների կորպուսի (ԻՀՊԿ) ցամաքային զորքերի զորավարժությունները։
Ինչպես գրում է mehrnews.com-ը, երեքշաբթի առավոտյան զորավարժությունների տարածք են ուղարկվել նաև ԻՀՊԿ ցամաքային զորքերի այլ ստորաբաժանումներ։
Արասի շրջանի զորավարժությունների տարածք են ուղարկվում բոլոր տեսակի տանկեր, թնդանոթներ, զրահատեխնիկա, հրթիռային ստորաբաժանումներ, օժանդակ մեքենաներ և այլ տեխնիկա։
Զորավարժությունների երկրորդ օրը զորավարժությունների տարածք է այցելել Իսլամական հեղափոխության պահապանների կորպուսի ցամաքային զորքերի հրամանատար, բրիգադի գեներալ Մոհամմադ Փաքփուրը։
Զորավարժությունների ընթացքում ցուցադրվում են Իսլամական հեղափոխության պահապանների կորպուսի ցամաքային ուժերի վերջին առաջադեմ, արդի և ժամանակակից սարքավորումները։
Զորավարժությունները ամենամյա առաքելության մի մասն են, որն ուղղված է Իսլամական հեղափոխության պահապանների կորպուսի ցամաքային ուժերի մարտունակության բարձրացմանը:
Զորավարժությունների օրակարգում են պարաշյուտային վայրէջքներ, գիշերային գործողություններ, ուղղաթիռների մարտական գործողություններ, մարտական և մահապարտ անօդաչու թռչող սարքերի գործողություն, ինչպես նաև Արաքս գետի վրա կամրջի կառուցում, ճանապարհների վերահսկում, բարձունքների գրավում և ոչնչացում։
Զորավարժությունների ուղերձը հարևան երկրներին խաղաղությունն ու բարեկամությունը և կայուն անվտանգության ամրապնդումն է, իսկ թշնամիներին՝ հայտարարելու Իսլամական հեղափոխության պահապանների կորպուսի ցամաքային ուժերի պատրաստակամության մասին՝ այլ զինված ուժերի հետ միասին պաշտպանելու երկրի սահմանները և վճռականորեն արձագանքելու ցանկացած սպառնալիքի, ասել է Փաքփուրը:
