Tert.am-ը գրում է.
Ֆեյսբուքյան ուղիղ միացմամբ Իշխան Սաղաթելյանը խոսել է «Դիմադրության» շարժման վաղվա անելիքների մասին։
Նա հայտարարել է, որ առավոտյան ժամը 08։00-ին սկսում են ողջ մայրաքաղաքով անհնազանդության բողոքի զանգվածային խաղաղ ակցիաներ։
«Կոչ եմ անում մեր հայրենակիցներին՝ ժամը 08։00-ին դուրս գալ փողոց, միանալ ակցիաներին։ Փակելու ենք ճանապարհներ, կասեցնելու ենք երթևեկությունը, ամբողջ քաղաքը պետք է առավոտյան պարալիզացվի»,- ասել է Սաղաթելյանը։
Նա դիմել է հանրային ծառայողներին, պետաշխատողներին, բոլոր քաղաքացիներին, ովքեր պատրաստվում են վաղն աշխատանքի գնալ. «Տեղեկացրեք ձեր գործատուներին, որ ունեք լեգիտիմ պատճառ վաղն աշխատանքի չգնալու։ Ըստ էության քաղաքը լինելու է պարալիզացված»։
Սաղաթելյանը դիմել է ուսանողներին՝ հորդորելով վաղը չհաճախել դասի, միանալ պայքարին։
Դիմել է նաև քաղաքական, հանրային գործիչներին, մտավորականներին հասարակության բոլոր շերտերին. «Կարևոր է ձեր մասնակցությունը։ Վաղը հստակ պետք է փաստենք, որ ժողովուրդն ամբողջությամբ դուրս է եկել փողոց, սա այլևս իշխանություն չունի մեր երկրում»։
Դիմելով այն քաղաքացիներին, ովքեր մասնակցելու են ակցիաներին, կոչ է արել զերծ մնալ սադրանքներից, լինեն համախմբած, երբեք կոնֆլիկտի մեջ չմտնել սադրիչների, քաղաքացիների հետ։
Նա հայտարարել է, որ ակցիաները կավարտեն այն ժամանակ, երբ կորոշեն, իսկ երեկոյան 19։00-ին Ֆրանսիայի հրապարակում տեղի կունենա հանրահավաք։
«Ո՞րն է այս անհնազանդության ակցիաներ իրականացնելու պատճառը և նպատակը։ Փաշինյանի հեռացման հանրային պահանջը ձևակերպված է, այլևս ակնհայտ փաստ է, այս ակցիաների, գործողությունների միջոցով այդ հանրային պահանջը պետք է անընդհատ, ամենօրյա ռեժիմով փաստենք, ցույց տանք, որ ինքն այլևս երկրում չունի իշխանություն, իշխանությունը պատկանում է ժողովրդին, կա իրական երկիշխանություն և օր առաջ այս չարիքի կառավարությանը հեռացնել, ովքեր վաղուց այլևս չեն սպասարկում Հայաստանի, Արցախի, առհասարակ մեր ժողովրդի շահերը»,- ասել է Իշխան Սաղաթելյանը։