Lurer.com-ը գրում է.
Աշխարհի քաղաքացիներից և կորպորացիաներից Ուկրաինայի համար ստացված բարեգործական օգնության չափը հասել է գրեթե 924 միլիոն դոլարի, և միջոցները շարունակում են հոսել։ Այս մասին հայտնում է Ուկրաինայի նախագահի գրասենյակը, փոխանցում է «Корпореспондент»-ը։
«Միջոցները հիմնականում գնում են ՄԱԿ-ի կառույցների և միջազգային մարդասիրական կազմակերպությունների հաշիվներին։ Եվ նրանք իրենց հերթին դրանք ուղարկում են` օգնելու մեր փախստականներին տարբեր երկրներում»,- ասել է Նախագահի աշխատակազմի ղեկավար, հումանիտար և սոցիալական հարցերի համակարգող շտաբի ղեկավար Անդրեյ Երմակը։
Միջոցների մեծ մասը ստացվել է բարերարներից` Մեծ Բրիտանիայից (47%), Նիդեռլանդներից (գրեթե 18%), Չեխիայից (11%) և ԱՄՆ-ից (գրեթե 8%):
Նախագահի աշխատակազմի ղեկավարի տեղակալ Յուլիա Սոկոլովսկայան նշել է, որ 50 օրվա ընթացքում Ուկրաինա է ներմուծվել 270 հազար տոննա մարդասիրական օգնություն։ Սննդամթերքը գնվել է ուկրաինացի արտադրողներից, և սննդի փաթեթներ են պատրաստվել գրեթե 12 միլիոն ուկրաինացիների համար։
