Armenpress.am-ը գրում է․
ՀՀ վարչապետ Նիկոլ Փաշինյանը պարզաբանեց, թե ինչու է նախորդ իշխանությունների օրոք վարած՝ Լեռնային Ղարաբաղի հարցով բանակցային գործընթացն անվանել «ֆեյք»: «Արմենպրես»-ի հաղորդմամբ՝ Փաշինյանն այս մասին ասաց ԱԺ-ում կառավարության անդամների հետ հարցուպատասխանին՝ անդրադառնալով «Հայաստան»-ից Աննա Գրիգորյանի հարցին:
«Բանակցային գործընթացը «ֆեյք» գործընթաց եմ անվանել այն պատճառով, որ բանակցային ամբողջ գործընթացը եղել է Լեռնային Ղարաբաղն Ադրբեջանի կազմում թողնելու վերաբերյալ: 1998-ից ԼՂ-ն դուրս է թողնվել բանակցային սեղանից: 1999-ին ՀՀ-ն ընդունել է կոնսենսուսի շրջանակներում Եվրոպայում անվտանգության խարտիան»,-ասաց Փաշինյանն ու ընթերցեց այն:
Վարչապետը շարունակեց. «Երբ 2000-ականներին ՀՀ-ն ԼՂ-ի հարցի կարգավորման համատեքստում քննարկել է տարածքների փոխանակման բանաձևը և առաջարկել է, որ Մեղրիի շրջանը հանձնի՝ Ղարաբաղը ստանալու դիմաց, սրանով ամբողջացրել է, որ ՀՀ-ն երեք քայլանի գործողությամբ ԼՂ-ն ճանաչել է որպես Ադրբեջանի մաս: Սա է պատճառը, որ ես այդ բանակցային գործընթացն անվանել եմ «ֆեյք», որովհետև այդ նույն իշխանության ներկայացուցիչներն այսօր այդ նույն համոզվածությամբ ասում են, որ այդպես կամ այնպես պետք է լիներ: Չի եղել այդպիսի բան»: