Lurer.com-ը գրում է.

Երկու օր է հանրության ուշադրության կենտրոնում է ՔՊ-ական պատգամավոր Նարեկ Գրիգորյանը: Երեկ վերջինս հայտնվել էր համացանցի օգտատերերի թիրախում, վերջինիս ծաղրում էին սեԿտեմբեր ասելու համար: Այսօր էլ ԱԺ-ում տեղի ունեցած միջադեպի փաստացի հրահրողներից մեկն էլ հենց Գրիգորյանն է: Ստորև ներկայացնում ենք, թե ինչով է հայտնի՝ ՔՊ-ական ամենաակտիվ պատգամավորը:

Նախ, նշենք, որ մամուլում առկա տեղեկության համաձայն՝ Գրիգորյանը Նիկոլ Փաշինյանի սանիկն է, ճիշտ է ինքը` Գրիգորյանն, այդ կապը հերքել է:

Համաձայն Գեղարքունիքի մարզպետարանի պաշտոնական կայքում առկա տեղեկատվության` Նարեկ Գրիգորյանը 2015 թվականից հանդիսանում է «Քաղաքացիական պայմանագիր» կուսակցության անդամ, Նորատուսի տարածքային կազմակերպության ղեկավար, կուսակցության քաղաքական խորհրդի անդամ: 2016-2018թթ. հանդիսացել է Նորատուս համայնքի ավագանու անդամ:

Գրիգորյանը հեղափոխությունից հետո ստանձնել էր Գեղարքունիքի փոխմարզպետի պաշտոնը, մինչ այդ ձկնավաճառ էր: Մամուլը գրում էր այն մասին, որ Գրիգորյանը բանակից ազատվել է ինքնավնասում կատարելով: Այդ մասին են վկայում նաև Նարեկ Գրիգորյանի թևերի սպիները, որոնք նրա լուսանկարներում նկատելի են:

Մեկ այլ աղբյուրի հաղորդմամբ՝ Նարեկ Գրիգորյանի կնոջ մայրը՝ Անուշ Բազկոյանը, Գեղարքունիքի նախկին մարզպետի 2009 թվականի կարգադրությամբ որպես վերստուգող է հրամանագրվել «Գավառ» բժշկական կենտրոնում, Լճափ, Ծովակ, Գանձակ համայնքներում գործող բուժամբուլատորիաներում, սակայն փաստացի աշխատանքի չի ներկայացել, և նրա անվամբ դուրս գրված առանձնապես խոշոր չափերի՝ ընդհանուր 7․002․854 դրամը յուրացման եղանակով հափշտակվել է։ Իսկ Նարեկ Գրիգորյանի կնոջ հայրը՝ Գեղարքունիքի նախկին փոխմարզպետ Արտաշես Նիկոյանը, փոխմարզպետի պաշտոնից ազատվելուց հետո աշխատանքի է անցել «Գավառ» բժշկական կենտրոնում՝ դառնալով փոխտնօրեն։ Նշված բժշկական կենտրոնում 2017թ. դեկտեմբերից 2019թ. մայիս ամիսն ընկած ժամանակահատվածում պետպատվերի շրջանակներում անվճար բուժօգնություն ցուցաբերված քաղաքացիների անվամբ ստացիոնար հիվանդների բժշկական քարտերում մտցվել են իրականությանը չհամապատասխանող, կեղծ տեղեկություններ, ինչի հետևանքով պետական միջոցներից հափշտակվել է առանձնապես խոշոր չափի՝ 3․126․700 դրամ գումար։

Համաձայն մամուլում շրջանառվող տեղեկություններից մեկի՝ Գեղարքունիքի փոխմարզպետ Նարեկ Գրիգորյանի և Ճամբարակի քաղաքապետ Վազգեն Ադամյանի ավտոմեքենաները երթևեկելիս են եղել և Ճամբարակի քաղաքապետ Ադամյանի մեքենան վազանց է կատարել Գրիգորյանի ավտոմեքենային: Այդ ամենը դուր չի եկել Գրիգորյանին, և նա կատարվածի մասին տեղյակ է պահել մարզային ճանապարհային ոստիկանության պաշտոնատար անձնաց և պահանջել Ճամբարակի քաղաքապետի մեքենան տեղափոխել տուգանային հրապարակ: Ադամյանը ոստիկաններից հետաքրքրվել է, թե ինչու են իր մեքենան տանում, ոստիկանները պատասխանել են, որ այդպես է ցանկացել Գեղարքունիքի փոխմարզպետ Նարեկ Գրիգորյանը: Միջադեպից հետո Ադամյանը գնացել է Գեղարքունիքի փոխմարզպետի հետ հաշիվներ պարզելու: Մի քանի րոպե մարզպետարանում խառնաշփոթ է ստեղծվել, սակայն ամեն ինչ ավարտվել է առանց լուրջ մարմնական վնասվածքների:

Համաձայն մամուլում շրջանառվող մեկ այլ տեղեկության` Նորատուսցի Ալիկը և Նարեկ Գրիգորյանը մտերիմ ընկերներ են, և վերջինիս անմիջական միջնորդությամբ էլ Նորատուսցի Ալիկը ազատ է արձակվել: Նարեկ Գրիգորյանը հերքել է դա և ասել. «Նման բան միանշաակ չկա:…Իհարկե ոչ, մենք ընդամենը համագյուղացիներ ենք»:

Ինչպես տեսնում ենք` Նարեկ Գրիգորյանը տիպիկ ՔՊ-ական պաշտոնյա է, վերջինս իր քաղաքական և քրեական կապերի շնորհիվ բավական հարմարավետ է իրեն զգում ԱԺ-ում՝ ցուցաբերելով ագրեսիվ և ոչ կառուցողական պահվածք: Ակնհայտ է, որ Գրիգորյանը վստահ է՝ իրեն այդ ամենը կներվի, ինչպես ներվել են վերը նշված բոլոր սկանդալային պատմությունները:

ԱԺ-ում այսօր բավական ագրեսիվ վարքագիծ էր դրսևորում նաև Հայկ Կոնջորյանը, ով հայտնի է որպես ճամբարափոխ պատգամավոր: Վերջինս սկանդալի կենտրոնում էր հայտնվել դեռևս նախորդ ԱԺ-ում, երբ հարևան Իրանի հասցեին աղմկահարույց հայտարարություններ էր արել` այդ երկիրը անվանելով ավտորիտար պետություն:

Անչափ դյուրագրգիռ էր նիստերի դահլիճում նաև Վահագն Ալեքսանյանը, ով ընդամենը երեկ էր բռնվել ստի վրա:

Ազգային ժողովում ոչ կոռեկտ ելույթով հանդես եկավ իշխանական պատգամավոր Վաղարշակ Հակոբյանը։

Վաղարշակ Հակոբյանը, ի դեպ, որպես Ժողովրդավարական Հայաստան երիտասարդական կուսակցության նախագահ վատ չէր վերաբերվում թաղային հեղինակություններին․«Թաղային հեղինակություններից սարսափել պետք չէ։ Նրանք մարդիկ են, ոքվեր իրենց թաղերում ունեն հեղինակություն և իրենց քաղաքական տեսակետները։ Այդտեղ ոչ մի դատապարտելի բան չկա»,-ասել էր Հակոբյանը։ 

Նույն հարցազրույցի ժամանակ Վաղարշակ Հակոբյանը, խոսելով 2012 թվականի Երևանի ավագանու ընտրությունների մասին, չի խոսում կեղծիքների մասին, այլ ընդունում է, որ ՀՀԿ-ն հավաքել է ամենաշատ ձայները։ Եվ սա այն դեպքում, երբ հիմա ամեն առիթի  խոսում են «կեղծված» ընտրությունների մասին։ Ի դեպ, հետաքրքիր է, որ այն ժամանակ, երբ ստեղծվում էր «Ժողովրդավարական Հայաստան երիտասարդական կուսակցությունը», խոսակցություններ էին շրջանառվում, որ նախագահական ընտրություններում կուսակցությունը պետք է աջակցի ՀՀԿ նախագահի թեկնածու Սերժ Սարգսյանին:

 

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել