Armeniasputnik.am-ը գրում է.
Արդարադատության նախարար Ռուստամ Բադասյանը հրաժարվեց մեկնաբանել ՀՀ երրորդ նախագահի հանդեպ քրեական հետապնդումը դադարեցնելու վերաբերյալ Երևանի ընդհանուր իրավասության դատարանի որոշումը։ ԱԺ–ում լրագրողների հետ ճեպազրույցում նախարարն ասաց, որ գործի ամբողջ տեղեկատվությանը չի տիրապետում, ինչի համար էլ չի մեկնաբանի։
Լրագրողները հետաքրքրվեցին, թե իրավական առումով «Մարտի 1»-ի էջը փակվա՞ծ է։
«Մեծ ցավ եմ ապրում տեղի ունեցած պրոցեսների մասով։ Չգիտեմ` «Մարտի 1»-ի գործով նախաքննության փուլում գտնվող դեռ մեկ գործ էլ կա, որը շարունակվում է։ Սակայն այլ մանրամասների համար պետք է դիմել մասնագետներին»,–ասաց Բադասյանը։
Քոչարյանի դեմ հարուցված քրգործին առնչվող մնացած բոլոր հարցերին նախարարը հրաժարվեց պատասխանել` հորդորելով դիմել համապատասխան մարմիններին։ Նրա խոսքով` իրենց քաղաքական նպատակը եղել է թե՛ տեղի ունեցած մարտի 1-ի ցավալի իրադարձությունների բացահայտումը, թե՛ բարեփոխումները դատական համակարգում։
«Ընկալում կա, որ այս ոլորտներում մենք դանդաղկոտություն ենք ցուցաբերել, որոշ քայլեր չենք իրականացրել։ Ունենք հաջողություններ, որոնք ինստիտուցիոնալ մակարդակում են և չեն երևում։ Հիմնական քննադատությունն այն է, որ վեթինգ չի կատարվել, ինչի համար ես պատրաստ եմ քաղաքական պատասխանատվություն կրեմ։ Հանրության հետ հարցերում պետք է ազնիվ լինել ու ասել, որ, այո, որոշ հարցերում ունենք ձախողումներ»,–ասաց Բադասյանը։
Նկատառմանը, թե խոսքը նաև «Մարտի 1»-ի գործի՞ն է վերաբերում` նախարարն արձագանքեց` կոնկրետ գործերի մասով կան պատասխանատուներ։
