Ժամանակակից պատերազմների արդեն դասական դարձող հիբրիդային բնույթը մեկ անգամ ևս ապացուցվեց Իրան-Իսրայել վերջին կիբեր-հակամարտությամբ։
Եթե իրանցիները կարողացան ապրիլին կազմակերպված հուժկու կիբեր-հարձակմամբ խոցել Իսրայելի համար կենսական նշանակություն ունեցող ջրամատակարարման համակարգերը և առաջացնել լուրջ դժվարություններ, ապա մայիսին իսրայելական հարվածը ուղղված էր Իրանի հարավային Բանդար Աբբաս քաղաքի Շահիդ Ռաջայի նավահանգստին, ինչի արդյունքում խափանումներ եղան դրա աշխատանքում։
Այս համատեքստում Հայաստանում պետք է լրջագույն ուշադրություն դարձվի ժամանակակից պատերազմների կիբեր-բաղադրիչին՝ հաշվի առնելով այն պարզագույն ճշմարտությունը, որ մենք արևելքից և արևմուտքից շրջափակված ենք, ըստ էության, թշնամական պետություններով։
Ընդ որում, Հայաստանը պետք է իրականացնի ոչ միայն պաշտպանողական միջոցառումներ, այլ նաև պատրաստ լինի ցանկացած պահի կիբեր-հարձակմամբ խոցելու հակառակորդների կենսական նշանակության համակարգերը։