Azatutyun.am-ը գրում է․
Ֆրանսիայի ազգային ժողովի նախագահ Ռիշար Ֆերանին երեկ հարցաքննել են կոռուպցիայի գործով անցկացվող հետաքննության շրջանակներում:
Նախագահ Էմանյուել Մակրոնն ասել է, որ չնայած այդ հանգամանքին՝ ինքը վստահում է Ֆերանին:
«Նախ Ռիշար Ֆերանը ֆորմալ հետաքննության մեջ է ներգրավված, ուստի, մինչև հակառակը չապացուցվի՝ նա անմեղ է: Սա շատ կարևոր է գիտակցել, որովհետև խոսքերն ունեն մեծ նշանակություն, երբ խոսում են հետաքննության մասին, մարդիկ կարող են ենթադրել, որ անձի մեղքն արդեն ապացուցված է, ուրեմն նրան կարելի է մեղադրել եթե ոչ դատարանում, ապա առնվազն բարոյապես», - ասել է կառավարության խոսնակ Սիբետ Նդիայեն:
Ռիշար Ֆերանին հարցաքննել են Լիլ քաղաքում, տվյալ գործի բնույթի մասին մանրամասներ չեն հաղորդվել:
Ֆերանը կարևոր դեր է կատարել Մակրոնի 2017 թվականի ընտրարշավի ընթացքում:
